ភ្នំពេញ៖ ក្រសួងសាធារណការ និងដឹកជញ្ជូន សម្រេចឱ្យក្រុមហ៊ុនសាងសង់បិទគ្រប់ច្រកចេញចូលផ្លូវល្បឿនលឿនឈប់អនុញ្ញាតឱ្យមានរថយន្តចូលទៅប្រើប្រាស់ផ្លូវបាន ដើម្បីទុកពេលសាងសង់ក៏ដូជាបញ្ជៀសនូវគ្រោះថ្នាក់ក្នុងការធ្វើដំណើរលើផ្លូវនេះ។
ក្នុងសេចក្ដីជូនដំណឹងចុះថ្ងៃទី១២ ខែកក្កដា ក្រសួងសាធារណការបញ្ជាក់ថា គម្រោងសាងសង់ផ្លូវល្បឿនលឿនភ្នំពេញ-ព្រះសីហនុ កំពុងនៅសាងសង់នៅឡើយជាពិសេសនៅមិនទាន់បានបំពាក់បរិក្ខារសុវត្ថិភាពចរាចរណ៍នៅឡើយ មួយវិញទៀតមានសាធារណជន និងប្រជាពលរដ្ឋមួយចំនួនបានចូលទៅប្រើប្រាស់ផ្លូវនេះ មានការកើនឡើងនិងបានបង្កឱ្យមានគ្រោះថ្នាក់ជាញឹកញាប់។
ដើម្បីបញ្ជៀសនូវគ្រោះថ្នាក់ទាំងនេះ និងដើម្បីទុកពេលឱ្យក្រុមហ៊ុនសាងសង់បញ្ចប់ ក្រសួងបានសម្រេចឈប់ឱ្យយានយន្តគ្រប់ប្រភេទចូលប្រើប្រាស់ផ្លូវល្បឿនលឿនរហូតសាងសង់រួច។
ក្នុងលិខិតនោះបញ្ជាក់ថា៖ «ក្រសួងសាធារណការ និងដឹកជញ្ជូនបានសម្រេចឱ្យក្រុមហ៊ុនសាងសង់បិទគ្រប់ច្រកចេញ-ចូល ដោយមិនអនុញ្ញាតឱ្យយានយន្តគ្រប់ប្រភេទ ចូលប្រើប្រាស់ផ្លូវល្បឿនលឿន ក្រៅពីយានយន្តដែលបម្រើការងារឱ្យគម្រោង និងយានយន្មានតម្រូវការចាំបាច់ដែលមានការអនុញ្ញាតពីក្រសួងសាធារណការ និងដឹកជញ្ជូនចាប់ពីពេលជូនដំណឹងនេះតទៅ»។
ការសម្រេចរបស់ក្រសួងសាធារណការគឺបន្ទាប់ពីមានគ្រោះថ្នាក់កើតឡើងជាបន្តបន្ទាប់នៅលើផ្លូវល្បឿនលឿននេះ។
កាលពីថ្ងៃច័ន្ទម្សិលមិញ រថយន្ត២គ្រឿងដែលបើកបរលើផ្លូវល្បឿនលឿននេះបានបុកគ្នានៅត្រង់ចំនុចភូមិកុមារពេទ្យ ឃុំអូរ ស្រុកភ្នំស្រួច ខេត្តកំពង់ស្ពឺ បណ្ដាលឱ្យមនុស្ស ៦នាក់ (ជនបរទេស ៤នាក់) រងរបួសធ្ងន់ និងស្រាល ត្រូវបញ្ជូនទៅមន្ទីរពេទ្យសង្គ្រោះ។
គម្រោងសាងសង់ផ្លូវល្បឿនលឿន-ភ្នំពេញព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវ របៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយពេលវេលាធ្វើដំណើរពីរាជធានីភ្នំពេញទៅ ផែសមុទ្រក្រុងព្រះសីហនុ ពីចំនួន ៥ម៉ោងមកត្រឹមតែ ២ម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ។ តាមគម្រោងក្រសួងគ្រោងដាក់ឱ្យប្រើប្រាស់ជាបណ្ដោះអាសន្ននៅដើមខែកក្កដានេះ តែត្រូវបានពន្យារពេលវិញដោយសារត្រូវការពេលបំពាក់បរិក្ខាសុវត្ថិភាព៕